Comissom Lingüística da AGAL inicia nova etapa sob a presidência do professor Carlos Garrido

O professor Jorge Rodrigues Gomes, proposto como novo secretário

Terça, 29 Setembro 2009 00:00

Atençom, abrirá numha nova janela. PDFVersom para impressomEnviar por E-mail
Engadir a del.icio.us Compartilhar no Twitter Compartilhar no Chuza Compartilhar no Facebook Compartilhar no DoMelhor

Carlos Garrido apresentou um ambicioso programa articulado em volta de três grandes objectivos

PGL - No passado sábado, 26 de Setembro, a Comissom Lingüística da AGAL, na sua segunda reuniom ordinária do ano, elegeu por unanimidade novo presidente para o período 2009-2013 o professor Carlos Garrido Rodrigues, quem sucede no cargo ao professor José Luís Rodrigues.

Carlos Garrido, natural de Ourense e de 42 anos de idade, é estudioso da língua especializada, lexicógrafo e tradutor científico, autor de vários livros (como o Dicionário Terminológico Quadrilíngüe de Zoologia dos Invertebrados e o Manual de Galego Científico) e professor titular de traduçom de textos científicos e técnicos na Universidade de Vigo.

Novo secretário da Comissom Lingüística

Como secretário da Comissom Lingüística será nomeado, em substituiçom do próprio Carlos Garrido, o professor Jorge Rodrigues Gomes, doutor em Filologia e docente de língua e literatura galegas no ensino secundário. Conforme os Estatutos da AGAL, ao seu Conselho compete, na sua próxima reuniom ordinária, referendar ou revogar esta decisom da Comissom Lingüística.

Três objectivos fundamentais no programa

Carlos Garrido, que foi candidato único à renovaçom da Presidência da Comissom Lingüística, apresentou um ambicioso programa articulado em volta de três objectivos fundamentais:

- Em primeiro lugar, fomentar a coesom e o funcionamento interno da Comissom Lingüística, capítulo em que se inclui, entre outras medidas, o estabelecimento de subcomissons e grupos de trabalho no seio da Comissom.

- Em segundo lugar, dinamizar a Comissom e incrementar a sua produtividade, o que compreende projectos como o da oportuna actualizaçom da normativa ortográfica da AGAL conforme as novidades do Acordo Ortográfico da Língua Portuguesa de 1990, realizar os primeiros contributos da Comissom nos ámbitos da codificaçom do léxico e da prosódia da variante galega da língua comum e elaborar estudos sobre onomástica.

- Em terceiro lugar, finalmente, projectar institucionalmente a Comissom Lingüística no seio da AGAL e na sociedade galega, para o que se planeia, entre outras medidas, abrir no Portal Galego da Língua umha secçom própria da Comissom Lingüística, digitalizar e disponibilizar no PGL todos os textos normativos da Comissom, atender um consultório sobre a língua (tira-dúvidas) e um serviço de assessoramento lingüístico para pessoas e colectivos e suscitar e apoiar o lançamento de diverso material destinado à divulgaçom do galego correcto por parte do Conselho da Associaçom.