AGAL participará com faixa própria na manifestaçom de 27 de janeiro

A associaçom colaborará na recolhida de assinaturas para a ILP Valentim Paz-Andrade

Segunda, 21 Janeiro 2013 00:00

Atençom, abrirá numha nova janela. PDFVersom para impressomEnviar por E-mail
Engadir a del.icio.us Compartilhar no Twitter Compartilhar no Chuza Compartilhar no Facebook Compartilhar no DoMelhor

PGL - A Associaçom Galega da Língua (AGAL) participará com faixa própria na manifestaçom convocada por Queremos Galego para o vindouro domingo, 27 de janeiro, contra o decreto do Ensino imposto polo Governo galego e pola mais recente reforma educativa do Executivo espanhol, que constituem um quadro normativo lesivo para o nosso idioma. A saída está prevista para as 12 h da Alameda de Santiago de Compostela.

Tal como nos últimos anos, o lema da faixa será «A nossa língua é internacional», que nesta ocasiom virá reforçado por um manifesto intitulado propositadamente em inglês: «Keep calm and teach/learn galician portuguese» (Mantenha a calma e ensine/aprenda galego-português). Nesta declaraçom, a AGAL assinala que «o galego é a nossa vantagem no mundo», precisamente polo carácter de língua internacional.

O manifesto da AGAL começa denunciando que o decreto que regula o uso do galego e do castelhano no sistema educacional galego nom serve nem para incrementar o bem-estar coletivo da sociedade galega nem apra atingir os objetivos de aprendizagem das duas línguas. Por este motivo, a associaçom pede a retirada da norma e a substituiçom por umha outra que explore a potencialidade internacional do galego, evidenciada por projetos implementados pola AGAL como os ateliês Ops! —o manifesto inclui as reflexões de um aluno que participou num Ops em Monforte de Lemos—, e na linha também do que reivindica a ILP Valentim Paz-Andrade. Precisamente, a associaçom colaborará com a equipa promotora desta iniciativa legislativa popular na recolhida de assinaturas durante a manifestaçom.

Nas redes sociais

Ademais de no sítio web criado para ocasiom, o manifesto e a imagem gráfica também se podem consultar nas redes sociais da AGAL (Twitter, Facebook) e do PGL (Twitter, Youtube), acompanhadas por umha versom (legendada) da cançom que está na moda, com o sugerente título "Opa AGAL Style". Precisamente, na rede social Twitter #OpaAGALStyle será umha das palavras chave a utilizar, junto com #KeepCalmAndJoinTheAGAL ou #WERTgonNHa .

 

JavaScript is disabled!
To display this content, you need a JavaScript capable browser.

 

Organizaçom

O Conselho da AGAL convida os sócios e sócias a participarem neste ato reivindicativo em que o a associaçom estará acompanhada polo grupo de percussom Trópico de Grelos, que porá música às palavras de ordem que serám cantadas. Para melhor organizar a comitiva da AGAL, membros do Conselho estarám na Alameda entre as 11:15 e 11:30 para ir acolhendo as sócias e sócios que se aproximarem.