O BNG denunciará perante a Unesco a vulneraçom dos direitos humanos e linguísticos do povo galego
O Grupo Parlamentar do BNG apresentará informes e denúncias também ao Conselho da Europa
Terça, 23 Junho 2009 06:00
Bieito Lobeira declarou que as medidas som extremas porque a situaçom também é extrema
PGL - O deputado nacionalista Bieito Lobeira comunicou à imprensa que o BNG denunciará perante a XXXV Conferência Geral da Unesco, que terá lugar no mês de Outubro, a vulneraçom da Declaraçom Universal dos Direitos Humanos assim como dos direitos lingüísticos dos galegos.
O deputado afirma que o Executivo de Núñez Feijóo dá ao idioma próprio da Galiza o trato legal de um dialecto. Perante este "atentado gravíssimo", Lobeira mostrou-se crítico com o actual governo e as medidas tomadas por este, como a realizaçom do inquérito sobre o uso do idioma na educaçom, a reforma das provas de acesso à funçom pública, a supressom das galescolas ou a eliminaçom de programas culturais da grelha da CRTVG.
Do mesmo jeito, a deputada Carmen Adán, que acompanhou a Lobeira nas declaraçons ante a imprensa, referiu que as medidas tomadas contra o galego na educaçom agem com umha cortina de fumaça para ocultar a supressom do programa gratuito de livros de texto.
Crise interna no PP pola língua da Galiza
Segundo informam vários meios, um sector do PP teria manifestado o seu desacordo com a gradual prostraçom do PPdeG cara às teses dos colectivos galegófobos, estratégia lingüística que afundiu o PP na Catalunha ou no País Basco. Ademais, acham que derrogar o actual texto irá contra o Plano de Normalizaçom Linguística, aprovado unanimemente no Parlamento na era de Manuel Fraga.
Ligado com o anterior, BNG e PSOE manifestárom que a derrogaçom do actual Decreto do galego no ensino e a sua substituiçom por um novo texto nom se realizará com consenso, e anunciárom que se o PP perder a maioria nas vindouras eleiçons, por sua vez derrogarám o decreto popular.
