Meios da direita espanhola atacam administraçom catalá por investir mais no catalám do que o Instituto Cervantes no espanhol

A Junta da Galiza investiu seis vezes menos em política lingüística do que a Generalitat em 2007

Quinta, 02 Outubro 2008 18:32

Atençom, abrirá numha nova janela. PDFVersom para impressomEnviar por E-mail
Engadir a del.icio.us Compartilhar no Twitter Compartilhar no Chuza Compartilhar no Facebook Compartilhar no DoMelhor

PGL - Meios afins à direita espanhola como o El Mundo ou Libertad Digital publicárom informaçons sobre o que denominam «gasto em imersom lingüística» por parte da Generalitat de Catalunya, que terá atingido em 2007 os 157 milhons de euros, o que suporia um aumento de 30,8% em relaçom ao ano anterior, e que ultrapassaria os 81 milhons investidos polo Instituto Cervantes na promoçom internacional do espanhol no mesmo período.

Nada falam esses meios sobre as necessidades concretas do povo catalám em relaçom ao seu idioma, gravemente afectado, como o basco e o galego, por séculos de imposiçom do idioma do Estado, o espanhol, único oficial e obrigatório em todo o território estatal.

A Generalitat catalá mantém nos últimos anos um progressivo aumento dos recursos económicos destinados à política lingüística, para favorecer a recuperaçom de espaços e de falantes para o idioma histórico da Catalunha, o que se comprova na evoluçom desde os 50 milhons de euros da verba correspondente no orçamento autonómico de 2005 até os 157 de 2007.

O diferente interesse de cada administraçom autonómica na matéria vê-se se compararmos o dinheiro investido no Principat da Catalunha com os 22.931.621 euros investidos pola Junta da Galiza em 2007, que em 2008 só aumentárom em 1,01%, passando a 23.247.547, enquanto os orçamentos totais autonómicos aumentárom em 7,3% no mesmo período. Quer dizer, a Junta da Galiza mantém-se na actualidade abaixo da metade do dinheiro investido pola Generalitat de Catalunya em 2005, e investe neste ano seis vezes menos do que investiu a administraçom catalá no ano passado.

 

 + Mais informaçom: