Festa 8º aniversário do Cineclube de Compostela

O lugar da cita, coma sempre é o Centro Social O Pichel (Santa Clara, 21)

Sábado, 04 Julho 2009 00:00

Atençom, abrirá numha nova janela. PDFVersom para impressomEnviar por E-mail
Engadir a del.icio.us Compartilhar no Twitter Compartilhar no Chuza Compartilhar no Facebook Compartilhar no DoMelhor

Cartaz da festa de aniversário do Cineclube

Cineclube - O Cineclube de Compostela celebra o sábado dia 4 de julho a sua tradicional festa de aniversário, com a que pom o remate a esta temporada 2008-2009.

 

A festa constará, como noutras ocasions de umha projecçom e concertos. Às 20:30, dará começo o filme musical “Building a Broken Mousetrap, The Ex Live in New York”, e às 22:30 começarám os concertos, com Malandrómeda, Cu de Vaso e Urro.

 

Building a Broken Mousetrap, The Ex Live in New York“ (Jem Cohen e Matt Boyd, EUA, 2004, VO, 63') é a gravaçom nada ortodoxa, realizada por Jem Cohem e Matt Boyd, de um concerto da banda holandesa The Ex na cidade de New York. Intercaladas com as imagens do grupo, em lugar de filmar ao público, introduz-se material sobre a cidade e de manifestaçons contra Bush e contra a guerra, para sublinhar “a importância do contexto, do feito de ser conscientes de que o concerto sucede em um momento histórico determinado, o que permite transformar a nossa mirada sobre o que estamos a ver e escoitar ao tempo que nos recorda que a música de The Ex nom persegue umha evasom da realidade”, nas palavras de Cohen. O filme está dividido em duas partes, umha primeira a preto e branco a 16 mm onde a cámara se imiscui polo meio dos músicos, chegando mesmo a semelhar molesta para estes e oferecendo planos desconcertantes de umha actuaçom, e umha segunda na que a montagem volve ensinar planos do público e onde volvem as cores cuidadas que tanto caracterizam a obra de Cohen.

A seguir a projecçom, às 22:30 darám começo os concertos, que este ano tenhem como cabeça de cartaz a Malandrómeda. Este grupo compostelám, formado a través da uniom dos pioneiros do rap em galego Hevi e Caldeirada, que participaram em grupos como Colectivo Urbano ou Non Residentz, fai hip-hop sem prejuízos, de altíssima qualidade e jogando com a experimentaçom e a vanguarda. Malandrómeda tem já três discos publicados: “Os Estranos Sempre Traen Malas Novas”, “Chegan Tarde” e “Malandrómeda 7”, e todos eles podem descarregar-se livremente e de balde desde a sua página web www.malandromeda.com. Nesta ocasiom, farám um concerto especial cinema, onde usarám clássicos das suas bandas sonoras preferidas.
Com eles estarám também “Cu de Vaso”, umha banda do Grove, ainda nos seus começos, que forma parte dessa nova cena musical que semelha estar a criar-se na península meca (“Schizophrenic Housewives”, ”Telephonez rouges”, “Punks and Company”, “Zoo-filia”, os desaparecidos “Lentejas los miercoles”..). Com ecos da Velvet Underground e The Stooges, esta banda promete com este concerto, no que presentarám a sua formaçom. O terceiro grupo em questom na festa som Urro, um trio compostelám de música experimental com o que o cartaz deste ano vira o mais variado possível musicalmente.

Com esta última actividade, o Cineclube pom finalmente o remate à temporada 2008-2009, polo que a actividade cessará durante as festas de Vrám. Mais depois do descanso estival, o Cineclube ainda há voltar no Outono com umha nova programaçom de mais cinema e cultura livre.

O filme vai ser projectado na sua versom original e com entrada de balde, podendo adquirir um bono ajuda para colaborar economicamente com o Cineclube. O concerto terá unha entrada de cinco euros, destinada aos grupos.