A Revira Volta!

O novo local está em Gonçalo Galhas n.º 4, rés-do-chao (Pontevedra)

Quarta, 16 Dezembro 2009 11:37

Atençom, abrirá numha nova janela. PDFVersom para impressomEnviar por E-mail
Engadir a del.icio.us Compartilhar no Twitter Compartilhar no Chuza Compartilhar no Facebook Compartilhar no DoMelhor

Dia 18 de dezembro, inauguraçom do novo local

A.C. Revira - Da Associaçom Cultura Revira temos dedicado as últimas semanas a acondicionar o que será a partir de dezembro o nosso novo centro social, coincidindo com o 6º Aniversário da associaçom, e que se vai inaugurar esta sexta-feira, dia 18, com um charla-colóquio.

Ficam atrás quase seis anos de luita e convívio no velho local da rua Arcebispo Malvar, do qual sempre guardaremos saudosas lembranças. Lá tivérom lugar concertos, charlas, colóquios, festas, ceias, exposiçons, actividades sempre vencelhadas à construçom nacional da Galiza, à defesa da língua e cultura galegas, do meio natural, dos direitos da mulher, dos valores solidários e internacionalistas.

Fotografia do novo local da Revira

O C.S Revira constitui um espaço imprescindível para o encontro e convívio de todas/os as/os que defendemos a superaçom do capitalismo e do marco jurídico-político espanhol, um projecto ao serviço dos movimentos populares da comarca de Ponte Vedra, que agora queremos revitalizar.

Nesta nova etapa da Revira pretendemos dar um novo impulso ao centro social, pulando por sermos mais efectivos na integraçom a nível de bairro,  por servir de altifalante das luitas populares e por constituírmo-nos num espaço referencial,  especialmente entre a mocidade, sempre de um ponto de vista plural e com afám integrador, favorecendo o debate e o encontro.

Fotografia do novo local da Revira

Acreditamos na vigência dos objectivos que vírom agromar a associaçom em 2003 e, cientes de nos atopar numha etapa caracterizada polo fracasso do quadro autonómico, polo ataque sistematizado à cultura e língua galegas e também ao nosso tecido produtivo mais básico, em plena crise neo-liberal, decidimos dar um passo adiante para contribuírmos com o nosso grao de areia à luita.

Pouco antes de finalizar o contrato de aluguer do anterior local, decidimos que a revitalizaçom passava tanto pola anovaçom da práctica diária, superando certas eivas que vínhamos arrastando, assim como pola mudança do próprio centro social a um local novo no qual pudéssemos ter umha maior interacçom com a vizinhança, tentando conseguir ademais um espaço aberto, visível, integrador, fugindo da fechaçom. A Revira nom tem nada a agochar e sim tudo a mostrar.

Fotografia do novo local da Revira

O novo local, no bairro de Santo Antoninho, tem dous andares e umha superfície aproximada de 130 metros quadrados. A parte inferior, a rés-do-chao,  acolherá tanto a zona de convívio como actos e exposiçons, e constituiu um espaço agradável e visível ao exterior por uns amplas vidraças e portas de vidro. Na parte superior, em fase de reforma menos avançada, situaremos a biblioteca (espaço polivalente de estudo e juntanças) ademais de um pequeno obradoiro e, com tempo, umha cozinha. Outro dos nossos projectos é o de constituirmos umha cousateca.

Fazemos um chamamento a movimentos sociais e colectivos da comarca, assim como a todas e todos aqueles que partilham no básico os nossos princípios, a participarem activamente nesta nova etapa, com especial ênfase em quem no passado formárom parte da associaçom e por motivos diversos se fôrm desvinculando. A Revira é um centro social aberto, combativo e comprometido, anima-te a participar!

Localizaçom do novo C.S. Revira
[prima aqui para ampliar a imagem]

ACTO DE INAUGURAÇOM: sexta 18 de dezembro às 19:30h. Charla-colóquio "O monte é nosso", com Fernando Pintos (pte. da comunidade de montes de Salzedo) e Xabier Míguez (pte. da comunidade de montes de Vila Boa).

Ceia de Aniversário às 22:30h no local. 15 euros. Para te apontares envia um mail ao endereço centrosocial[arroba] revira.org

Posteriormente, festa no local.

Novo endereço: Gonçalo Galhas nº 4, rés-do-chao. Ponte Vedra.