Maria Espantoso - Domingo, dia 18 de outubro de 2009. A data ficará bastante tempo no imaginário colectivo como o dia em que mais pessoas saírom às ruas em defesa da língua galega. Mais de 70 mil segundo os nossos cálculos, cifra incrementada até 100 mil pola plataforma Queremos Galego e reduzida a 50 mil pola Polícia.

Fora números, triunfa acima de tudo a visom do coraçom de Compostela paralisado desde antes das 12 do meio-dia até perto das três da tarde, a imagem das principais artérias da cidade substituindo os automóveis pola maré cidadã que se manifestou contra a imposiçom do castelhano e contra os constantes anúncios de políticas desgaleguizadoras.

Dá ideia da magnitude da manifestaçom assinalar que polas 14h20, mais de duas horas depois do início oficial da mobilizaçom (convocada para as 12h), e depois de umha hora de intervenções dos porta-vozes de Queremos Galego, centos de pessoas ainda se dirigiam à zona histórica de Compostela, a maior parte integrantes de Galego Sempre Mais.

Alberto Núñez Feijóo, com só seis meses à frente da Junta, já tivo em maio o recorde de ser o presidente em cujo mandato de convocou a maior manifestaçom em defesa do galego, quando 50 mil pessoas saírom às ruas. Agora, em outubro, a cifra incrementou-se notavelmente para vergonha do chefe do Executivo autonómico. Duvidoso honor o de lograr por duas vezes esta marca em só meio ano.

Maré laranja

Também houvo boa participaçom no bloco reintegracionista da plataforma Galego Sempre Mais, que igual que no 17 de Maio deixárom uns metros de separaçom com o resto da manifestaçom.

Videogaleria do 'bloco laranja' na manifestaçom

Perto de mil pessoas optárom por formar parte da 'maré laranja' num percurso idêntico ao do cortejo oficial... até que se chegou às imediações da zona histórica da capital, momento no que o bloco reintegracionista se concentrou na praça do Toural, onde Beatriz Bieites (da Gentalha do Pichel) e o escritor Séchu Sende dérom leitura ao manifesto de Galego Sempre Mais.

A maré laranja começou a concentrar-se aos poucos na Praça do Toural
[ampliar imagem]

Faixa da A. C. Foucelhas, de Ordes, no Toural
[ampliar imagem]

Beatriz Bieites (A Gentalha do Pichel) e o escritor Séchu Sende, na leitura do manifesto
[ampliar imagem]

«TVG, manipulaçom»

Além das palavras de ordem habituais como «Na Galiza, em galego», «Galego, português, a mesma língua é» ou «Galego, língua da escola», entre muitas outras, na manifestaçom também se ouvírom berros pouco habituais desde o fim do Governo de Manuel Fraga. «TVG manipulaçom» pudo escuitar-se na conexom que fizo a televisom pública galega. Os manifestantes nom perdoárom que nos dias prévios à marcha a TVG mantivesse um silêncio quase absoluto a respeito.

Na conexom em directo da TVG pudo escuitar-se
o berro de «televisom, manipulaçom!»

Reacções

O veterano galeguista Avelino Pousa Antelo, presidente da Fundaçom Castelão, lembrou umha frase do pessoeiro que dá nome à instituiçom e assinalou que «se ainda somos galegos e por obra e graça do idioma». Por sua parte, a actriz Patrícia Vázquez afirmou que «por vez primeira em toda a história da autonomia, o Governo galego nom apenas nom está a defender a nossa língua própria, mas lidera o ataque contra o seu uso». O músico e comunicador Xurxo Souto realizou umha intervençom intercalada com canções e instou a mocidade urbana à defesa activa do galego.

Do ámbito político salientamos as intervenções de Guilherme Vázquez, porta-voz nacional do BNG, e de Manuel Vázquez, secretário-geral dos socialistas galegos. O primeiro reclamou que o PP rectifique e regresse ao consenso e assinalou que a cidadania se manifestou contra a política «extremista» da Junta. O segundo acusou Feijóo de ser o «inimigo público número um» do galego, apesar de que do seu próprio partido estám a reclamar umha involuçom na legislaçom normalizadora em matéria toponímica.

NOTA: esta notícia irá-se actualizando. Podes colaborar enviando-nos fotografias ao correio noticias[arroba]pglingua.org

+ Ligações relacionadas:

• Web de Galego Sempre Mais
• Cartaz da manifestaçom
• Mais e mais povo com o galego [Primeira Linha em rede, 19/10/2009]
• Importante mobilizaçom reintegracionista num dia histórico para a língua [Web de Nós-UP, 19/10/2009]
• Feijóo coloca o galego na Lusofonia e reaparece Anxo Lorenzo [PGL, 19/10/2009]
• Adesons e chamamentos à participaçom para o dia 18 [PGL, 16/10/2009]
• Galego Sempre Mais chama a mobilizar-se pola língua o dia 18 no bloco reintegracionista [PGL, 06/10/2009]
• Convocada reuniom da Plataforma Galego Sempre Mais [PGL, 01/10/2009]
• Dossiê sobre o conflito lingüístico no 'Voz Própria' [PGL, 28/07/2009]
• Manifesto pola hegemonia social do galego [PGL, 15/07/2009]
• Mais de 50.000 pessoas saírom à rua para denunciar a imposiçom do castelhano [PGL, 18/05/2009]
• Galiza vencerá! [artigo de opiniom de Maurício Castro no PGL, 17/05/2009]
• Plataforma Galego Sempre Mais apresentada publicamente [PGL, 19/04/2009]