Marta Santos | Valentim Fagim - Umha semente está a germinar em Vigo. O PGL quijo conhecer de perto o projeto e entrevistou Carolina Díaz, umha das promotoras. Se o leitor/a desta notícia morar em Vigo e tiver um miudo/a, leia com atençom o que vem a seguir.

-Qual foi o momento certo em que nasceu o projeto de criar umha escola Semente? Quais fôrom as motivaçons?

E difícil sabê-lo com certeza. Houvo várias tentativas, que partiram de diferentes pessoas, para reunir gente e começar a andaina. Ao fio dumha delas surgiu o grupo atual a começos de 2013.

As motivaçons fôrom várias: a inexistência dum ensino imersivo em galego na cidade de Vigo, o interesse por umha educaçom alternativa à existente, em que se defendesse a co-educaçom, a laicidade, o assemblearismo, a interaçom com a natureza, o respeito pola auto-regulaçom da criança e a integraçom no contexto do seu bairro e da cidade. E saber que tudo era possível com o exemplo da Semente Compostela.

A primeira Semente nasceu em Compostela, umha cidade onde a nossa língua tem um maior vigor social. Que dificuldades, ou facilidades, apresenta umha cidade como Vigo?

Vigo é umha cidade mui grande e a oferta de espaços para crianças é mui pequena e nom preenche as necessidades existentes. A situaçom sócio-lingüística da língua galega é muito diferente à de Compostela mas cá umha das facilidades é que há mais populaçom e também mais pessoas lusófonas.

Por outro lado tampouco há oferta educativa que garanta a educaçom na nossa língua. Como dificuldade temos que, de toda essa populaçom, desconhecemos quanta poderia estar interessada realmente neste projeto já que a carga diglóssica é mui grande.

Quais som os perfis do grupo promotor? Que tipo de pessoas se estám a aproximar ao projeto e/ou a puxar dele?

O perfil é mui variado: há famílias com crianças interessadas na criaçom deste espaço para elas, outras famílias que vem que ainda que já chegam tarde de mais para as suas crianças, sempre podem participar dos acampamentos e outras atividades. Temos ainda educadoras e pessoas muito sensibilizadas que querem que nasça este projeto...

Será que o sistema público galego nom garante o que oferecerá a escola Semente?

Nom garante umha "educaçom galega e em galego". Nom só se trata da presença da nossa língua na escolarizaçom das crianças ou da inexistente imersom na nossa cultura, tampouco favorece pedagogias que respeitem o rimo das crianças e o seu desenvolvimento. Tudo isto vai depender da/o profissional que tenham em cada momento.

Que tipo de local estades a procurar? Algumha zona em particular?

Um local diáfano no seu interior, um rés-do-chão por exemplo, de uns 100m2 e com um espaço exterior para conviver com a natureza e trabalhar a horta.

A zona tem que ser acessível, buscamos umha aonde chegue o Vitrasa e que tenha facilidade também para os carros mas nom temos preferência por nenhum bairro.

Que tipo de iniciativas estades a desenvolver na atualidade no processo de contruçom da escola?

Até o momento dar-nos a conhecer com postos em festivais, recolhida de fundos a través de bonos-ajuda, mas isso de forma externa. Internamente estamos a trabalhar na procura de locais ou nas diferentes comissons de trabalho.

A partir de outono realizaremos atividades para crianças. Agora está-se a perfilar o que será a I Jornada Educativa organizada pola Asociaçom Pro-Semente Vigo.

Em que ano escolar está projetada a sua estreia? Para que idades?

2014-2015 seria o ideal para ter tempo de atopar um local, financiamento preciso eu umha equipa de profissionais qualificadas. A faixa etária vai dos três aos seis.

A respeito da pedagogia a utilizar, existe algum modelo concreto?

Nom se identificará com umha linha pedagógica concreta. Assumimos como principio básico umha pedagogia transformadora que esteja virada para os interesses populares de transformaçom da sociedade; articule os conhecimentos científicos sistematizados com as situaçons concretas da realidade e das experiências das crianças, as suas necessidades e interesses; fomente a atividade e as iniciativas dos estudantes mas também contando com as iniciativas da educadora ou educador respeitando os ritmos de aprendizagem e o desenvolvimento psicológico ; valore o dialogo; assuma a escola como parte integrante da sociedade e desenvolva umha cidadania crítica: pessoas capazes de pensar, atuar e de serem protagonistas da história do nosso País.

Já para finalizar, em que forma os visitantes da PGL e as pessoas que leiam esta entrevista poderiam apoiar o projeto? Existe algum email de contacto?

Fazendo-se sócias/os da Asociaçom Pro-Semente Vigo para apoiar economicamente o projeto, participando também das comissons de trabalho, comprando o material elaborado, ajudando na procura do local ideal, há muitas formas! O melhor é que se ponham em contacto com sementevigo[arroba]@gmail.com ou no telefone 650 02 86 33.

+ Ligaçons relacionadas:

• Facebook Semente Vigo
• Nova Semente em Vigo [PGL, 24/07/2013]
• Por umha escola Semente em Vigo [PGL, 29/05/2013]
• II Jornadas de Análise para o Ensino Popular: Um mergulho na imersom [PGL, 18/02/2013]
• II Concerto da Semente: os três sereios [PGL, 16/01/2013]
• Ceia do primeiro aniversário da Semente [PGL, 08/10/2012]
• Concerto de Pablo Díaz na escola infantil compostelana 'A Semente' [PGL, 12/07/2012]
• Um projeto de País (Artigo de Heitor Rodal Lopes) [PGL, 27/12/2011]
• A Semente, escola de ensino galego, abre por fim as portas [PGL, 02/11/2011]
• Jornadas de análise para o ensino popular: 'Umha escola para nos fazermos grandes' [PGL, 06/10/2011]
• Escola Semente abre convocatória para duas vagas de trabalho [PGL, 23/09/2011]
• Marta Santos e Marcos Lopes: «O nome da escola Semente dá ideia de abrolhar, de começar a vida, nom só das crianças, mas também dum projeto que aspira a crescer» [PGL, 14/09/2011]
• Andamos novamente a sementar. A colheita desta nova espécie será no outono [PGL, 09/09/2011]
• Abre 'Semente', primeira escola de ensino em galego [PGL, 31/08/2011]
• Web da Semente Compostela
• Facebook Semente Compostela
• Contacto Semente Compostela: sementecompostela [arroba] gmail [ponto] com