PGL - A Secretaria Geral de Política Lingüística anunciou que “proximamente” a Junta realizará umha nova convocatória, com cargo aos Orçamentos de 2012, tanto para ediçom de materiais curriculares como para as equipas de normalizaçom dos concelhos.

Este anúncio, de concreçom incerta, nom impediu a crítica da Coordenadora Galega de Equipas de Normalizaçom e Dinamizaçom Linguística polo adiamento das ajudas à normalizaçom no ensino nom universitário.

Anxo Lorenzo, secretário-geral de Política Linguística, assegurou em Comissom Parlamentar, em resposta a umha pergunta apresentada por Román Rodríguez (PP) sobre o futuro da ordem de ajudas aos serviços de Normalizaçom Linguística dos concelhos, que aprovará “em breve” umha nova ordem que substituirá a convocatória anulada em setembro. Esta será bianual (2011-2012) para que as autarquias que realizaram despesa neste ano contando com a partida “podam imputá-lo”, e priorizará àqueles concelhos que “compartilhem os seus serviços lingüísticos”, os ofereçam de “maneira mancomunada” ou estejam integrados na futura Rede de Dinamizaçom Lingüística.

O secretário-geral também respondeu a umha pergunta formulada por Carme Adán (BNG) sobre a supressom de ajudas à ediçom de materiais curriculares em galego reiterando a sua “clara preocupaçom” por esta “medida excecional” e assegurou que, desde o dia que tivo conhecimento da eliminaçom desta despesa, se pujo em contacto com os afetados para comprometer-lhes novas convocatórias que suprissem as anteriores.

Durante a sua intervençom, Anxo Lorenzo lembrou que ambas as partidas foram anuladas no mês de setembro por mor dos “incumprimentos do Estado” nas transferências do Fundo de Cooperaçom, o que teria levado a Junta a realizar “modificações” nas suas despesas orçamentárias.

Rede de Dinamizaçom Lingüística

Anxo Lorenzo aproveitou para anunciar que a finais deste mês de outubro terá lugar o ato de constituiçom da Rede de Dinamizaçom Lingüística, em que se ratificará a entrada das quase 100 entidades já aderidas provisoriamente, se elegerá a Junta Diretiva e se fará a declaraçom formal de constituiçom da Rede.

Nova denúncia da Coordenadora Galega de ENDL

Por sua parte, a Coordenadora Galega de ENDL denunciou que a Secretaria Geral de Política Linguística nom convocou segundo os prazos previstos as ajudas ao fomento do galego correspondentes ao curso 2011-2012, o que implicará a eliminaçom de numerosas atividades de formaçom do alunado por impossibilitar a planificaçom e execuçom dos projetos de promoçom do idioma no ensino nom universitário.

O comunicado das ENDL afirma que as ajudas “acumulam um atraso superior a um mês a respeito da convocatória do ano passado”.  A Resoluçom da Junta, tomada a 10 de agosto, "pola qual se aprovam as bases para a realizaçom de projetos de inovaçom em dinamizaçom lingüística em centros de titularidade da Conselharia de Educaçom e Ordenaçom Universitária para desenvolver no curso académico 2011-2012", foi publicada no DOG de 15 de setembro, sendo de um mês o prazo de apresentaçom de solicitudes.

+ Ligaçons relacionadas:

• A notícia no sítio web da Secretaria Geral de Política Lingüística
• Comunicado de imprensa da Coordenadora Galega de ENDL (PDF, sem data)
• Convocatória de ajudas para projetos de inovaçom em dinamizaçom lingüística no ensino público nom universitário^PDF [DOG, 15/09/2011]
• O BNG continua a denunciar o desleixo da Junta com o galego [PGL, 20/09/11]
• A Junta anula as ajudas para a promoçom do galego dirigidas aos editores e aos concelhos [PGL, 10/09/11]